大師寸嘴show　笑馬雲似外星人

股評人沈振盈（沈大師）講嘢一向寸寸貢，同行都冇面畀，上周六索性同另一位股評人羅尚沛合作，喺九展搞場「串到盡」財經talk show，盡情發揮兩位寸人寸到盡嘅本事。
做得財經talk show，當然要寸現今最具話題性嘅財經人物，阿里巴巴創辦人馬雲首當其衝。當台上屏幕彈出馬雲個嘜頭，羅尚沛就指住張相話「呢個唔係乜嘢外星人……」大師即刻駁落去話「但佢行為真係似外星人。」
大師所指嘅外星人行為，應該係話馬雲係都要交易所遷就佢，畀佢用合夥人制度上市。佢仲話，如果阿里上市，各位抽嘅就預咗要蝕，事關「話明阿里巴巴，當然預咗佢係40大盜啦。」

[i][b]借機反擊黃國英[/b][/i]
提起馬雲，當然要講埋好想做阿里生意嘅港交所（388）CEO李小加。兩位股評人話佢害到證券界雞毛鴨血，更激動到玩埋粗口諧音，羅尚沛話，「李小加本身就係一句粗口。」大師補充，要將佢個名掉轉讀先明白㗎。
除咗話題人物，當晚亦有唔少股評人被寸。最近着住大家樂（341）套制服做代言嘅「青姐」胡孟青梗走唔甩。沈、羅二人發現青姐坐喺觀眾席，即刻借題發揮，羅尚沛話，青姐一定冇輸錢：「佢咁多年都搵唔到嘢做，係近排搵番份waitress嚟做，所以佢係冇錢輸。」
大師亦有仇報仇，寸番早幾個月開財經talk show時、笑大師幫股市打齋嘅黃國英（Alex）。大師反擊話，打齋嘅人唔會叫「大師」，而係叫「喃嘸佬」，然後就指住Alex張相就話：「即係好似佢講嘢咁。」羅尚沛隨即踩多腳，寸Alex個show，觀眾坐得舒服啲，唔爆吖嘛。

[img]http://static.apple.nextmedia.com/images/apple-photos/apple/20131104/large/04by02p.jpg[/img]
■青姐當晚都有坐喺觀眾席，但係一樣被寸。

[img]http://static.apple.nextmedia.com/images/apple-photos/apple/20131104/large/04by01p.jpg[/img]
■沈振盈（左）同羅尚沛話，馬雲行為似外星人。　



來源:蘋果日報網站